| |
Refrain
Dors, min p'tit quinquin,
Min p'tit pouchin
Min gros rojin
Te m'fras du chagrin,
Si te dors point qu'à demain
1er couplet
Ainsi, l'aut'jour, eun' pauv' dintellière,
In amiclotant sin p'tit garchon,
Qui d'puis tros quarts d'heure, n'faijot braire,
Tachot d' l'indormir par eun' canchon,
Ell' li dijot : Min Narcisse,
D'main t'aras du pain d'épice,
Du chuc à gogo,
Si t'es sache, et qu'te fais dodo,
Refrain
2ème couplet
Et si te m'laich' faire eun' bonn' semaine,
J'irai dégager tin biau sarrau,
Tin pantalon de drap, tin giliet d'laine,
Comme un p'tit milord te s'ras farrau,
J' tacatrai, l'jour de l'ducasse,
Un polichinell' cocasse,
Un turlututu,
Pour juer l'air du Capiau pointu.
Refrain
3ème couplet
Nous irons dins l'cour Jeannette-à-Vaques,
Vir' les marionnet's, comme te riras,
Quand t'intindras dire : un doup' pou' Jacques,
Pa' l' porichinell' qui parl' magas,
Te li mettras dins menotte,
Au lieu d' doupe, un rond d' carotte,
I' t' dira : Merci,
Pins' comm' nous arons du plaisir.
Refrain
4ème couplet
Et si par hasard sin maite s'fache,
Ch'est alors Narciss' que nous rirons,
Sans n'n avoir invi' j'prindrai m'n air mache,
J'li dirai sin nom et ses surnoms,
J'li dirai des faribolles,
I m'in répondra des drôles,
Infin, un chacun,
Verra deux pestac' au lieu d'un.
Refrain
5ème couplet
Allons serr' tes yeux, dors min bonhomme,
J'vas dire eun' prière à P'tit Jésus,
Pour qui vienne ichi, pindant tin somme,
T' fair' rêver qu' j'ai les mains plein's d'écus,
Pour qui t'apporte eun' coquille,
Avec du chirop qui guille,
Tout l'long d'tin minton,
Te pourléqu'ras tros heur's de long.
Refrain
6ème couplet
L' mos qui vient, d' Saint-Nicolas, ch'est fiête,
Pour sûr, au soir, i viendra t'trouver,
I t'fra un sermon, et t'laich'ra mette,
In d'zous du ballot, un grand painnier,
I l' rimplira, si t'es sache,
D'séquois qui t' rindrons bénache,
Sans cha sin baudet,
T'invoira un grand martinet.
Refrain
7ème couplet
Ni les marionnett's, ni l' pain n'épice,
N'ont produit d'effet. Mais l'martinet
A vit' rappajé l' p'tit Narcisse,
Qui craignot d' vir arriver l' baudet,
Il a dit s'canchon-dormoire,
S' mèr' l'a mis dins s'n ochenoire,
A r'pris sin coussin,
Et répété vingt fros che r'frain :
Refrain
|
|
L'Canchon Dormoire